كتبت الاعلامية لارا نون على صفحتها على فايسبوك:
اليوم رح خبركن قصة رسام لبناني عالمي مهدد إنو يصير أعمى
من هلق ل ٤ سنين لأنو مصرياتو بالبنك بلبنان انسرقو طبعاً..
ولأنو المبلغ المطلوب لإجراء العملية ب بلجيكا يتراوح بين ٧٠ ألف و٨٠ ألف يورو…
نعم… الرسام يونس كجك Yves Koujouk فنان عالمي بعدو شاب… انحكى عنو بمعظم دول العالم… عايش بفرنسا… إجا علبنان كذا مرة قبل مرضو… وكثّف زياراتو بالفترة الاخيرة… بتعرفو ليه؟…
إجا عند أطفال مرضى السرطان بجمعية Kids First وصار يرسم معن ل هالولاد بالمستشفيات… وجاب أهم الاعلاميين والممثلين ليشاركوه الرسم مع الولاد… وياما… لوحات بقيت… وولاد صاروا بالسما…
رسم يونس كجك أهم اللوحات الموجودة ببيوت زعما وفنانين… هالزعما والفنانين يلي اليوم مش سئلانين عنو ولا عن غيرو…
يونس بإيام الابداع وتقدمة اللوحات كهدايا للإعلاميين… ما حدا من الاعلاميين سأل عنو بمحنتو…
يونس قال لي: “لارا ما بدي شي من حدا… ما بدي إشحد… عندي لوحات إذا الناس بيشتروهن… يمكن ضل قادر إقشع الناس يلي بحبن… وضل اشتغل بوزنات الخالق”…
“لارا… اوعا الذل… نحنا ولاد الله… والله ما رح بيتركنا”…
يا جماعة الخير والحب والعطاء… اذا ٤٠ ألف شخص منا تبرعو بدولارين بس أو ب ١٠٠ الف ليرة… منرجّع النور لعيون يمكن تنطفي…
يا ريت ب هالدايم دايم… يا ريت ببداية هالسنة… نبدا ايامنا بالعطاء… هيك الله ببارك ايامنا وعيالنا…
بترجاكن… بكل حب… نوقف حد يونس بالفلس يلّي مش باقيلنا غيرو… بالمحبة يلي جامعتنا…
عندي ثقة انو هالولاد يلّي رسم معن يونس لوحات العمر…وصاروا بالسما… رح يرسموا لوحة حياة يونس… وولادة نور جديد… بعيونو… من خلالكن انتو…
ساعدونا!
