كتبت الاعلامية لارا نون بحرقة قلب على صفحتها على فايسبوك:
أعزائي امن الدولة المحترمين:
انتو وعم تداهموا بيتو ل ويليم نون… رح خبركن وين بتلاقوا الديناميت المطلوب…
عذرا بالبيت ما في صوَر لرؤسائكم وأشباه الرجال يلي استعبدوكن… رح تلاقوا صوَر شهيد معلقة عالحيط اول ما تفوتوا بالباب…حدن صورة المسيح المصلوب… بتفوتو عالشمال بتلاقو غرفة النوم… هونيك نبشوا تحت الفرشة بتلاقو شي طويل مشتبه فيه… مسبحة قديمة كل يوم بتصلي فيها نانسي اختو… بتفوتو عالصالون بتلاقو كمان صوَر ظاهرة فيها جزمة دجو نون… جزمة أغلى من أغلى رشوة أخدتوها لتلقطوا خيّو للشهيد اليوم… بتطلعو شوَاي لبرا بتلاقوا كنيسة حجر فيها عالحيطان تياب معمودية دجو وبدلة الطلائع والفرسان… ورديتو واغراضو… فيها ديناميت حب ورحمة… فيها دموع زينة ام دجو يلي اليوم طلبتولا النشرة يمكن تكون عاملة شي جريمة بالبلد مش عارفين فيها… فيها حرقة قلب اب عم تطفولو قلبو يوم بعد يوم…
اعزائي… روحو عالكنيسة هونيك بتلاقو طلبكن… الديناميت… ديناميت الدينونة يوم الحساب… قدام الله… ويا ويلكن من الله!
أطلقوا سراح ويليام نون فوراً!
