بيجوز الصليب مش لنحملو..الصليب ت هوي يحملنا..
صليب منطلع عليه، تنشوف الاشيا من فوق..
الصليب مشوار.. الصليب زيارة.. لفوق.. لعند يسوع
الضعف والحسد والانانية وكل خطية، من فوق شو صغار!!
أديش قدرانين نغفر إزا طلعنا لفوق..
من فوق المشهد أوسع.. السما أقرب.. والأرض أصغر
إي.. إنتا بحاجة تبعد شوي..
بحاجة تطلع فوق كل التفاصيل حواليك..
وتشوف كل شي من عيونو، متل ما هوي شافا..
بحاجة لرحلة صلاة.. بتبلش بغمضة عين، وإشارة صليب..
الليلة.. حمول كل شي بقلبك.. طلاع لعند يسوع عصليبو،
تخايل حالك معو فوق.. وكون معو وحدكن، وسلمو كل شي..وعالأكيد.. رح تترك كل التقل فوق وترجع، سلامو بقلبك..
الأب بيتر حنا
كتار بصلّو، وبيطلبو من الله،
وبس ينجحو، بيقولو: “حظنا حلو”
فجأة بتصير قصة حظ، وبيغيب دور الله..
لاء.. هيدا مش حظ..
هيدي عناية الله، وعيون الله عليك..
شو حلو، تفتخر بهالشي،
وشو حلو، قدام كل الناس، تقول:
نشكر الله.. الله ما تركني ولا لحظة..
شو حلو هالنجاح، ينقلك لاختبار أعمق بعلاقتك مع الله..
النجاح مش انو ننجح بالحياة،
النجاح هوي إنو نعيش كل شي مع الله،
وهيك كل اختبار بصير ناجح..
الأب بيتر حنا
