تحدث الفنان كريم فهمي عن مسلسل “220 يوم” ووصفه بالمرهق نفسيا.
وقال كريم فهمي خلال لقائه في برنامج “كلام نواعم”: “المسلسل دا عملي كوابيس ولحد النهاردة بصحى من النوم في كوابيس رهيبة لأني قعدت سنتين أو أكتر شغال عليه تعبني نفسيا جامد من أول الكتابة لحد ما خلصنا تصوير”.
وعن فكرة أن البطل في مسلسل “220” أخفى على زوجته مرضه وإن كان كريم فهمي في الواقع يخفي عن زوجته بعض الأمور قال: ” في اللحظة دي مش فاكر إن كان حصل وخبيت عليها لكن أنا ذاكرتي ضعيفة دايما لما بيكون في حاجة بحكيها لمراتي لأنها هي اللي هتشيل المعلومة، على المستوى الشخصي أنا بحب المشاركة، الصراحة مهمة لأن الزوجين بقوا واحد في كل حاجة أنا بحب دايما أن كل الحاجات اللي ممكن تكون بتحصل على مستوى الشغل والحياة اليومية اللي ينفع تتقال بقولها على طول، ودا بالنسبالي لأن كل واحد حياته وظروفه مختلفة، أنا راجل مش بعرف أعمل غير شغلي وهي قايمة بباقي الحاجات”.
كريم فهمي وصبا مبارك على بوستر مسلسل 220 يوم
وأضاف كريم فهمي: “المسلسل قصة حب بين أحمد ومريم وأصعب حاجة في صناعة عمل أن الشرير بتاعة العمل أنت مش عارف تمسكه بإيدك لأنه “المرض” هو دا صعوبة المشروع دا بالذات، البطل مرضيش يقول لمراته لأنها كان عندها حلم بقالها 7 سنين نفسها تخلف ولما بقت حامل اكتشف أنه مريض، دي كانت ظروفه قرر ميقولهاش، ربنا يبعد عننا”.
ومسلسل “220 يوم” بطولة كريم فهمي وصبا مبارك وحنان سليمان التي تقدم دور والدة كريم فهمي، وعايدة رياض في دور خالته، إلى جانب علي الطيب، لينا صوفيا، يوسف رفعت، وغيرهم من الوجوه الشابة.
المسلسل من تأليف محمود زهران، وسيناريو وحوار نادين نادر، وإخراج كريم العدل، وإنتاج شركة “صباح إخوان” وتكون من 15 حلقة
