الليلة بدي خاطب المزاج البيروتي ولاهل بيروت مزاجهم الخاص
بيروت قلب لبنان وقلب بيروت هني ناسها بكل الوانهم واطيافهم ،
انك تكون ابن بيروت يعني شفت وسمعت جمعات المثقفين والثوار والمضطهدين والمجانين من كل العالم يلي هربو من تزمت بلدانن واجو يحكو ع صوت عالي ببيروت
انك تكون ابن بيروت يعني شفت جحافل المستعمرين بمخططاتن الخبيثة هني وعم بحاولو اركاع المدينة وآلاف اطنان القنابل عم بتدك البيوت وعم تحاول تطحن الناس تحت ركام المباني ولكن بيروت ولا يوم رفعت الرايات البيضاء.. فكان صمودها عظيماً بعظمة اهلها …
لبيروت مواعيد كثيرة مع الحلم , الحلم ببناء الدولة من الاشرفية وبداية حلم الشيخ بشير لقريطم وبداية حلم الشيخ رفيق
ولبيروت مواعيد كثيرة مع الوجع والاغتيالات من بشير ل رفيق وباسل، ، وجورج و ووليد ومحمد وبيار وجبران وسمير شهداء 14 آذار وشهدا المرفا وشهيد الغدر باسكال سليمان ايه باسكال سليمان لانو كل الشهدا يلي سقطو بكل لبنان سقطو لانو بيروت عصية على المخططات الخبيثة ولانو بيروت حرة ورح تبقى حرة ولانو لبنان منو صدفة بهيدا الشرق
وهلق واصل 4 اب وببيروت ام الشرائع يلي تاسست فيها اول جامعة للحقوق بعدها السلطة السياسية القضائية والامنية عم بتعطل التحقيق وعم تحمي الهاربين من وج العدالة وبعدن الاهالي حاملين الصور وناطرين شي يوم ياخدو حقن بهيدا البلد
ب 4 اب بيروت عندها لقاء مع كل بي وام وخي واخت حبيب وحبيبة خلونا نوحد الصوت لنعرف الحقيقة
اجتمعنا الليلة بالعشاء السنوي لمركز بيروت الثانية بالقوات اللبنانية لنقول انو القوات اللبنانية هي جزء لا يتجزأ من النسيج الاجتماعي ببيروت من المزرعة ل راس بيروت المصيطبة الباشورة متل ما هي جزء من نسيج الاشرفية والصيفي والرميل والمدور وطبعا اكد ت القوات اللبنانية من خلال مناصرينها ومحازبينها و المؤيدين لخطها السيادي بالانتخابات الاخيرة حضورها السياسي ببيروت
منتذكر الحرب و ومنعرف مآسيها ونعرف قيمة من بنى وعمر
لكننا بكل حب نبحث عن بيروت ،، بوطنيتها.. بفنها والثقافة .. ب دور السينما ومسرحها الوطني نبحث عن بيروت الجامعة وساحة الحرية وملتقى الديمقراطية ..
بيروت جامع الامين وكنيسة مار جريس
هيدي بيروت التي ترتقي بناسها ..
هيدي بيروت سيدة العواصم
هيدي بيروت التي تغفر وتسامح كل يلي اساؤوا لالها … بس بدنا العدالة
عشتم عاشت بيروت وعاش لبنان
Dressed by Marian Apikian
